आरबीआई-दो हजार नोट
भारतीय रिजर्व बैंक के गवर्नर शक्तिकांत दास ह किहीन कि दू हजार रूपिया के नोट ल वापिस लेना मुद्रा प्रबंधन के हिस्सा हे। ओमन किहीन कि आरबीआई ह कतको बेरा ले स्वच्छ नोट नीति के पालन करत हे। श्री दास ह किहीन कि आबीआई ह समय-समय म कोनों विशेष श्रृंखला के नोट मन ल वापिस लेथे अउ नवा नोट जारी करथे। आज नई दिल्ली म मीडिया ले गोठबात करत किहीन कि दू हजार रूपिया के नोट ल खासतौर म नोटबंदी के बाद वापस ले गे नोट मनके कमी ल पूरा करे बर सुरू करे गे रिहीस अउ अब ए उद्देश्य ह पूरा होगे हवय अउ हमर तीर पर्याप्त नोट हवय। ओमन किहीन कि बैंक मन ले केहे गे हवय कि ओमन ह काली ले सुरू होवइया दू हजार रूपिया के नोट के वापसी बर जरूरी व्यवस्था करय। आरबीआई गवर्नर ह आसा जतईन कि ए बछर तीस सितंबर तक दू हजार के जादा ले जादा नोट सरकारी खजाना म वापिस आ जही।
आबीआई ह स्पष्ट करे हे कि आम लोगन बिना कोनों पर्ची भरे बैंक ले एके घांव म दू हजार रूपिया के दस ठन नोट ल बदल सकत हे। एखर बर कोनों पहिचान पत्र जमा कराय के जरूरत नइ हे।
भेंट मुलाकात
मुख्यमंत्री भूपेश बघेल ह आज भेंट-मुलाकात कार्यक्रम म कोरबा जिला के रामपुर विधानसभा क्षेत्र के चिर्रा अउ कुदमुरा गांव पहुंचीन। ए दउरान ओमन ह इकहत्तर करोड़ तेईस लाख रूपिया ले जादा के रासि के आने-आने विकास काम के लोकार्पण, भूमिपूजन अउ सिलान्यास करीन। मुख्यमंत्री ह ग्राम चिर्रा अउ कुदमुरा म धान खरीदी केन्द्र, बरपाली म स्वामी आत्मानंद अंग्रेजी माध्यम स्कूल, रामपुर अउ उमरेली म नवा कॉलेज खोले जाय जइसन कतकोन घोषणा करीन।
अपन प्रवास के दउरान मुख्यमंत्री ह ग्राम चिर्रा म रूरल इंडस्ट्रीयल पार्क म लगे प्रसंस्करण केन्द्र के अवलोकन करीन। इहां ओमन ह आने-आने महिला समूह डहार ले चलत गतिविध के जानकारी लीन। बाद म श्री बघेल ह ग्रामीण मन ले गोठबात करीन अउ ओमन मन ले राजीव गांधी ग्रामीण भूमिहीन श्रमिक न्याय योजना संघरा दूसर योजना मनके जानकारी लीन।
राष्ट्रीय रामायण महोत्सव
रायगढ़ म अवइया एक ले तीन जून तक राष्ट्रीय रामायण महोत्सव के आयोजन करे जाही। महोत्सव म विशेष रूप ले अरण्य कांड उपर आधारित रामायण गाथा के प्रस्तुति होही। अइसने माने जाथे कि भगवान श्रीराम ह अपन वनवास काल के दउरान जादा बेरा छत्तीसगढ़ के दंडकारण्य म बिताय रिहीन। संस्कृति विभाग के अधिकारी मन ह बतईन कि राम लीला मैदान म होवइया ए महोत्सव म मध्यप्रदेश, उत्तरप्रदेश, महाराष्ट्र, केरल, गोवा संघरा दस राज्य के रामायण दल के सामिल होय के उम्मीद हे। उहें, विदेशी कलाकार मन डहार ले विशेष रूप ले रामायण कथा के मंचन करे जाही।
महोत्सव के पहिली दिन इंडियन आइडल फेम शंमुख प्रिया अउ सारेगामा फेम शरद शर्मा शिरकत करही। उहें, दू जून के मशहूर गायक बाबा हंसराज रघुवंशी अउ लखबीर सिंह लक्खा के संगीतमय प्रस्तुति होही। आखिरी दिन तीन जून के लोक गायिका मैथिली ठाकुर अउ देस के मशहूर कवि कुमार विश्वास ह अपन कार्यक्रम दीहीं।
निर्वाचन-प्रशिक्षण कार्यक्रम
प्रदेस म अवइया विधानसभा चुनाव के तैयारी ल लेके रईपुर म निर्वाचन अउ सहायक निर्वाचक रजिस्ट्रीकरण अधिकारी मनके दू दिन के प्रसिक्षण कार्यक्रम कराय गीस। प्रसिक्षण म सबो अधिकारी मन ल निर्वाचक नामावली तैयार करे ले जुड़े कानूनी प्रावधान के बारे म जानकारी दे गीस।
ए मउका म मुख्य निर्वाचन पदाधिकारी रीना बाबा साहेब कंगाले ह उम्मीद जतईन कि ए प्रसिक्षण कार्यक्रम ह प्रतिभागी मन ल उंखर निर्वाचन क्षेत्र के निर्वाचक नामावली तैयार करे के संबंध म नियम अउ कानून के अच्छा जानकारी दीही, जेखर ले ओमन ह अपन क्षेत्र म निर्वाचन के काम ल बने ढंग ले कर सकय।
दुर्घटना
धमतरी जिला के नगरी थाना क्षेत्र म आज दू ठन फटफटी म होय टक्कर ले तीन झन युवक मनके मउत होगे। नगरी पुलिस ले मिले जानकारी के अनुसार ग्राम घोटगांव के तीर ए हादसा ओ बखत होइस, जब दू ठन फटफटी मन अचानके आपस म टकरा गीन। ए हादसा म दू झन के मउकाच म मउत होगे अउ एक झन घायल युवक ह अस्पताल ले जावत खानी दम तोड़ दीस।
भाजपा-गौठान निरीक्षण
भारतीय जनता पार्टी के प्रदेस म ‘‘चलबो गौठान-खोलबो पोल‘‘ अभियान जारी हे। एमा प्रदेस भाजपा अध्यक्ष अरूण साव ह मुंगेली जिला के ग्राम रेहुंटा म गौठान के निरीक्षण करे बर गीन। बाद म ग्रामीण मन ले गोठबात करत ओमन किहीन कि ए गौठान म कोनों व्यवस्था नइ हे। ओमन आरोप लगईन कि ए गौठान म लाखों रूपिया खर्चा करे गीस। फेर एखर अंदर एको ठन गाय नइ मिलीस। इहां न तो पानी के व्यवस्था हे अउ न ही शेड। श्री साव ह आरोप लगईन कि घोटाला करे बर राज्य के कांग्रेस सरकार ह गौठान बनाय हे।
श्री साव ह प्रदेस प्रवक्ता दीपक महस्के अउ ग्रामीण मन संग धरसीवां विधानसभा क्षेत्र के मुड़पार, असौंदा, तुलसी, बुडेनी, बेलदारसिवनी मनके गौठान के निरीक्षण करीन। ए गौठान मन म घलो अव्यवस्था होय के आरोप लगईन।
उहें, नेता प्रतिपक्ष नारायण चंदेल ह जांजगीर-चांपा के नवागढ़ क्षेत्र के रोगदा गांव के गौठान के निरीक्षण करीन। ए दउरान श्री चंदेल ह राज्य सरकार उपर गौठान के माध्यम ले तेरह सौ करोड़ रूपिया के घोटाला करे के आरोप लगईन।
नेता प्रतिपक्ष-शराबबंदी मांग
नेता प्रतिपक्ष नारायण चंदेल ह प्रदेस म सराबबंदी के मांग करीन हे। ओमन किहीन कि सराबबंदी नइ होय ले लोगन के अकाल मउत होवत हे। श्री चंदेल ह आज जांजगीर-चांपा जिला के रोगदा गांव म जाके देसी सराब पीये ले होय तीन झन लोगन के मउत के मामला म मृतक मनके परिवार वाला मन ले भेंट करीन। ए दउरान ओमन ह राज्य सरकार ले पीड़ित परिवार ल मुआवजा दे जाय के मांग करीन। ओमन किहीन कि घटना के सात दिन बाद घलो पीड़ित परिवार ल न तो मुआवजा मिले हे अउ न ही प्रसासन के कोनों अधिकारी गांव पहुंचे हे।
भाजपा-पीएससी आरोप
भारतीय जनता पार्टी ह राज्य लोक सेवा आयोग के भर्ती म धांधली करे के आरोप लगावत ए मामला के जांच करे के मांग करीन हे। नेता प्रतिपक्ष नारायण चंदेल अउ अकलतरा विधायक सौरभ सिंह ह किहीन कि ए बखत भर्ती म चुने गे बीस झन प्रतिभागी मनके अंक ल सार्वजनिक करना चाही। खबर के मुताबिक भाजपा ए मुद्दा के सेती लगातार आंदोलन करत हे।
संतोष पांडेय-भवन लोकार्पण
राजनांदगांव सांसद संतोष पांडेय ह छुरिया ब्लॉक के भंडारपुर म नवा बने सामुदायिक भवन के लोकार्पण करीन। उहें, ग्रामीण मनके मांग म सांसद ह गांव म यात्री प्रतीक्षालय के निर्माण बर भूमिपूजन घलो करीन। ए मउका म ओमन किहीन कि केन्द्र के मोदी सरकार ह सरलग देस म विकास ल आगू बढ़ाय के काम करत हे।
मुंगेली युवा-उत्सव
आजादी के अमृत महोत्सव के तहत मुंगेली म आज अमृतकाल पंच-प्रण के थीम ल लेके जिला स्तरीय युवा उत्सव के आयोजन करे गीस। एमा प्रतिभागी मन ह रंगोली, पेंटिंग, कविता, लेखन, भासन, सामूहिक नृत्य जइसन विधा म अपन सानदार प्रस्तुति दीन। केन्द्रीय खेल अउ युवा कार्यक्रम के मदद ले बिलासपुर नेहरू युवा केन्द्र डहार ले राखे गे ए उत्सव म सांसद अरूण साव मौजूद रिहीन।
माओवादी समाचार
बीजापुर जिला के गंगालूर थाना क्षेत्र म पुसनार तीर माओवादी मन संग होय मुठभेड़ म कोबरा बटालियन के दू झन जवान घायल होगीन। घायल जवान मन ल इलाज बर जिला अस्पताल लाय गेहे।
उहें, दंतेवाड़ा जिला म सुरक्षा बल ह पांच किलो के आईईडी बरामद करे हे। एला माओवादी मन ह जवान मन ल नकसान पहुंचाय खातिर पल्ली-बारसूर रद्दा म घोटिया चउक तीर लगा के राखे रिहीन। बम निरोधक दस्ता ह एला मउकाच म निष्क्रिय कर दीन।
इही बीच, सुरक्षा बल ह सुकमा जिला म छत्तीसगढ़ अउ तेलंगाना के सीमा म भारी मात्रा म विस्फोटक सामान बरामद करे हे। ए विस्फोटक तेलंगाना ले छत्तीसगढ़ कोति लाय जावत रिहीस। तेलंगाना के कोत्तागुड़म के पुलिस अधीक्षक डॉक्टर विनिथ ह बतईन कि तेलंगाना पुलिस अउ सीआरपीएफ के संयुक्त कार्रवाई म दस झन मिलिशिया सदस्य अउ माओवादी समर्थक मन ल घलो गिरफ्तार करे गेहे। एमा बीजापुर जिला के माओवादी मन घलो सामिल हे।
